Ko wai mā ka whakahaere i ō mahi ako?

Mā ngā kaimahi o tō tari ā-rohe ngā āhuatanga o te ako e ārahi, e āwhina i a koe kia ū rawa tō waka ako ki uta.

Ko tā te whānau kōhanga reo he āwhina, he whakaruruhau i a koe ki te whakatutuki pai i te katoa o ngā mahi o ia kete. Ka tōhua anō hoki e rātou he kaiāwhina hei ārahi, hei poipoi i a koe ā kia tutuki ngā mahi.  Mā te purapura koe e āwhina, e tautoko anō hoki ki ō hiahia.

He Kōrero Whānui

Me he pātai āu, whakapā mai ki tēnei nama 0800KŌHANGA.

I te timatanga o ia tau o te ako ka whakarite ngā tari a rohe puta noa i te motu he rā whakawhanaungatanga, ki kōnei ka whai maramatanga ki ngā whakaritenga o ngā ākoranga, otira ka whai tautoko anō hoki

Mā ngā tari ā-rohe e whakapā atu ki ngā ākonga kua uru mai, ka whakamōhio atu i ngā whakaritenga mō ngā rā whakawhanaunga.

Ko Ngā Manu Pīrere ngā karahipi tuku a Te Kōhanga Reo. Ka whakawhiwhia ēnei karahipi ki ngā ākonga a Te Kōhanga Reo kua puta ngā ihu, ā, e whai ana i ngā akoranga a ngā whare wānanga.  

He ukiukinga mahi, he ukiukinga tau te āhua o ngā mahi. Nā tēnei ka taea e koe te tono pūtea hei āwhina i ō mahi ako. Haere ki www.studylink.govt.nz mō te roanga atu o ngā kōrero. 

Ka taea e ngā ākonga te tono kāri i Te Tari Matua o Te Kōhanga Reo. Ko te kāri whakamana ākonga nei ka rite tonu ki tā ngā whare wānanga i whakawhiwhi ai, ā, he whakaahua anō hoki hei whakaatu ko wai koe me ōna hua anō ka puta.

He mea whakature tā ngā pirihimana tirotiro. He tikanga hōmiromiro haumarutanga tēnei me mātua whakatutuki e ngā kōhanga reo i te wā ka whai kaimahi hou rātou nā runga tonu i te āhua o te mahi tahi, o te tiaki tamariki kāore ō rātou mātua, ō rātou kaitiaki rānei i te kōhanga reo. Me mātua whakatutuki tēnei ture e te katoa o ngā pākeke e utua ana, he ākonga rānei rātou i te kōhanga reo.  Ko tā te kōhanga reo haepapa i raro i te ture Children Act 2014 he whakatutuki i te tirohanga ā-ture.

Mehemea ka hiahia whakauru mai koe ki tētahi o ngā akoranga, ā, e whai mahi ana koe i tō kōhanga reo, ka noho tapu tō tirohanga ā-ture ki ngā kōnae a Te Tari Matua o Te Kōhanga Reo. Whakapā atu ki tō tari ā-rohe ki te hiahia kōrero atu anō koe.