Skip to main content

Ko te Kaupapa a Te Kōhanga Reo he whakakotahi i ngā whānau ki te whakarauora, ki te whakapakari anō hoki i te reo me ngā tikanga.

Ko tā Te Kōhanga Reo he manaaki, he poipoi i ngā pīpī paopao ki te poho o te whānau e tū tangata ai i roto i tō rātou ao Māori, e mātau ai ki te reo me ngā tikanga.

Ko te Kaupapa o Te Kōhanga Reo te huarahi whakapakari i te reo, ki te whakamarae anō hoki i ngā tikanga ki te taha o te whānau. Ka hīkoi tahi te whānau me ā rātou tamariki ki te ako i te Kaupapa o Te Kōhanga Reo.

Ko Te Kōhanga Reo tētahi o ngā pou o te Whare Māori o te iwi Māori. I whakatakotoria te Ara Tūāpae a te Kōhanga Reo hei oha ki ngā whakatipuranga me ngā reanga ka hua mai.

Ko Pukeatua te kōhanga reo tuatahi i tuwhera i te 13 o Paengawhāwhā 1982. Mai i taua wā kua neke atu i te 50,000 ngā tamariki kua puta i te kōhanga reo. Kua pakeke aua mokopuna tuatahi rā, ā, ko rātou ngā mātua o ngā mokopuna kei te kōhanga reo ināianei.

Kōhanga Tūwāhi

Kōhanga Locator

I tēnei wā, neke atu i te whā rau, ono tekau ngā Kōhanga Reo puta noa i Aotearoa.

Nā te āhua tonu o te Kaupapa i koroutia ai te whakatūtū kōhanga reo puta noa i te ao. I tēnei wā kua tūtū mai ngā kōhanga reo i Piripane, i Poipiripi, i Poihākena, i Urupū me Rānana.

Nā te Kaupapa anō i whakaaweawe ngā Iwi Taketake o te Ao pērā i te iwi o Hawaii, ngā iwi o Kānata, te iwi Inuit me ngā iwi o Amerika ki te whakatūtū kōhanga e whai ana i ngā āhuatanga o te kaupapa, engari e whakamahi tonu ana i ō rātou ake reo taketake.

He mea roherohe a Aotearoa ki ōna “Rohe”, ā, kei tēnā rohe, kei tēnā rohe ōna anō Purapura. Ko te Purapura he kāhui kōhanga reo, ā, kei tōna kotahi rau ēnei ā-motu. Kō tā te Purapura he tautāwhi, he ārahi i ngā whānau kōhanga reo. Ko tā ngā kōhanga reo o ia Purapura he wānanga, he tuari wheako, he tuari mōhiotanga mō ngā āhuatanga o te kaupapa.

I tua atu i tēnei, he tari ā-rohe me āna kaimahi kei ia Rohe. Ko tā ngā tari ā-rohe tekau me ā rātou kaimahi he tautāwhi, he āwhina, he ārahi, he whakamārama i ngā kaupapa whakangungu me ngā kaupapa whakahaere a te whānau kōhanga reo.