Nanny Piki Waretini
 

Pūkohukohu te kitea

He rehutai roimata

I pūpū ake i te puna wai o hāku

Kamo e tangi nei

I te aranga o te Pono
 

Ka tangi te hāku o roto, ka tangi te hāku mōteatea mōu e te pou kuia o te Awanui-ā-Rua, e Kui Piki Te Kaha, Piki Te Ora, Piki te Māramatanga e. E te pou kuia, e te whaene, kua ngū tō reo ki te mata o te whenua. Kua kapohia koe e ngā ringa o aituā kia rarau atu ki te tatau o te pō. Ko koe tērā e manaako nui nei ki tō tātou Kaupapa o te Kohanga Reo.

Ko koe nō tērā i whakatōkia te kākano o te reo me ngā tikanga tuku iho ki ngā uri whakatupu. Ko te poipoi, ko te manaaki i ngā mahi a te Kōhanga Reo i Aotea rohe whānui te mātāpono o te ora.

Hoki atu ki te iwi nui e kui o te wāhi ngaro. Haere tahi atu me tō tatou Kīngi Tuheitia Pōtatau Te Wherowhero VII, whakairia tō wairua ki te whata o Hinenui-o-te-Pō whakangaro atu ai kāutou i te tirohanga kanohi. Ka purutia tonutia te māramatanga me ngā taonga o uki e ngā tini raukura kua puāwai mai i te Kōhanga reo.  

Moe mai rā e te pou kuia e te ruahine e te rūruhi, i tō moenga roa. Hoki atu ki tō makau ki a Koro George Waretini, ki ō tūpuna, ki te kāinga tūturu. Haere, e moe, okioki atu rā.

Kaati! Ko rātou te hunga wairua ki a rātou, e moe, okioki ai. Ko tātou tonu te mōrehu tangata kia tātou, tēnā koutou, tātou.

Our Nanny Piki will lie in state at her home till 10.30am today, then she will be taken onto Te Ao Hou marae, Somme Parade at 11am.

For those travelling, Aotea Kōhanga Reo will meet this afternoon at the gate at 3pm. Te rā nehu is on Tuesday (11am).

Whānau will then take her kawe mate to Tūrangawaewae on Wednesday.

E te iwi, tangihia ngā mate huhua o te wā, o te marama, o te tau.