Te Whānau
E pono ana Te Kōhanga Reo ki te tiaki, ki te whakaora ake i te reo Māori me ōna tikanga katoa. Ko te whānau te taura here e taka ai ki a rātou te kaha whakatairanga i te oranga tonutanga o te reo Māori, o te ao Māori.
“Tērā te wā ka whānau mai he tamaiti o te kupu whakaari, māna tātou e ārahi”
Ka whakahauhia ngā whānau kia whai wāhi mai ki te reo Māori, ki te hīkoi ngātahi hoki me ā rātou tamariki. He take tino nui te whai wāhi mai o te whānau ki te kōhanga reo.
“Matua rautia.”
E tautokona ana ngā whakataunga, ngā whakahaere, ngā haepapa a te whānau kia taea tonutia ai te whakaū, te whakatairanga i te reo Māori me ōna tikanga katoa. E whai ake nei ngā tino pukapuka a te Poari Matua e whakamahia ana:
● Te Korowai: - Kei konei ngā aratohu hei whakarite Tūtohinga, ngā mātāpono a te kaupapa, ngā whāinga me ngā koronga i raro i ngā Pou e Whā, arā,
- Ko te Reo Māori anake i roto i te kōhanga reo ia rā, ia rā;
- Kei te whānau te mana whakahaere;
- Kia tū tika, kia tū pono ki te kaupapa;
- Whakatauiratia ngā whanonga e ora pū ai te hinengaro, te wairua, te tinana o te tamaiti, engari me whakatūturu te tohu manaaki rangatira.
● Te Tūtohinga: - Te kupu taurangi a ngā whānau kōhanga reo ki te Poari Matua.
● Te Whāriki: - Te marautanga mātauranga whakawhanake mokopuna i roto i tōna ao Māori mā tōna reo Māori.
● Te Ara Tūāpae: - Te mahere rautaki mō ngā tau e 25 (2008 - 2033), i whakaritea e ngā whānau kōhanga reo mō te Kaupapa.
Ka āhei ia tamaiti kia poipoia rātou, mā roto mai i te Kaupapa o Te Kōhanga Reo, ki te ao o ngā tikanga o tō rātou ao Māori. Koia tēnei he tino taonga tuku iho.