1-Waka Ama Nationals 2016

Mā nga mokopuna e ārahi i ngā pakeke koinei te āhua o te hākinakina te waka ama. O te manomano i huihui mai ki Karapiro  neke atu i te 900 ā tātou taitamariki i whakauru ki ngā whakataetae waka ama ā-motu. He whakataetae mā te katoa, mai i nga tau 7,  ki te 70 neke atu te pakeke.

Mai i te tīmatanga o ēnei whakataetae ā-motu i ngā tau 1991, tae noa ki tēnei te tau 2016, kua maha ake te hunga Kōhanga reo e whakauru ana i ā rātou tamariki i ō rātou whānau ki tēnei mahi whakapakari hauora, herehere whanaunga.

I whakaohotia te kaupapa waka ama i te tau 1981, nā te haere o Matahi Whakataka-Brightwell ki Tahiti, ka kite ia i a rātou e reihi waka ama ana. Ka puta te pakirehua, a te tangata whenua o Tahiti, “ko ō koutou tīpuna ngā tohunga mō te whakahaere waka engari kahore he waka o te iwi Māori. Ka hoki mai a Matahi ki Aotearoa ka whakatūria e ia te karapu tuatahi ko Mareikura tēra.

1-IMG_7594

Nanny Rita Toko

Inaianei kua 65 ngā karapu puta noa. E ai ki tētahi kuia nō Tūhoe a Nanny Rita Toko i tae mai ia ki te tautoko i āna mokopuna tuarua, ki te tautoko hoki i te karapu o Mareikura. Ahakoa, kāre he waka hoe pēnei i  Ruātoki,  he rākau noaiho, e tino rata ana ia ki ēnei mahi hākinakina. Hei tāna ko te mea nui ko te maha o nga iwi kei tēnei hui he Māori, ko te nuinga o ngā mokopuna nō ngā Kōhanga reo.

Ko Nanny Whakaata nō Parihaka e tautoko ana i ngā Kura Kaupapa me te Kōhanga reo “ko te Kōhanga reo te tuāpapa mō ngā mahi katoa, ki te tika mai a reira ka tika anō te huarahi ki mua, ka mahea!”

Anei he kapo whakaaro mai i aua hākinakina i tū i ngā wiki kua pāhure.