Dr Tīmoti Kāretu

Dr Tīmoti Kāretu

Nei te tau 2015 kua eke mai ki runga i a tātou me ōna awhero, maruāpō katoa.  I roto i ngā mihi ki te Tau Hou ko te tangi anō hoki ki ō tātou mate tuatini e hinga nei, e hinga nei i runga i ō tātou papa huri, huri noa i te motu.  Ko rātou ki a rātou, ko tātou ki a tātou ka tahuri ai ki ngā mahi e ora tonu ai tō tātou reo, e pakari ake ai hoki ngā kōhanga e whāngai nei i te reo ki ā tātou mokopuna.

He tau raru nui te tau ka hipa engari ahakoa ngā whakapōreareatanga o te wā, pūkaha tonu ana koutou ki ngā mahi, nā konei ka mihi te Poari Matua ki a koutou i tūtakitaki tonu nei i te ahi kia kore ai e weto.

Heoi anō tā tēnei pānui he whakamōhio atu e whakatikatika ana te Poari Matua ki te torotoro haere i ngā rohe kōhanga reo. Ka tīmata ā te 12 o Poutūterangi i Tamaki Makaurau, ā, ka oti atu ki Mataatua, Tauranga Moana ā te 1 o Paengawhāwhā.

Inā tūpono ka panonihia ētahi o ngā rā nei, ka tae atu he whakamōhio ki a koutou.

Waiho ake ki konei ā tātou mihi mō te wā nei.

Hei konā mai rā koutou katoa

Nā Te Poari Matua