Ia tau, ia tau ka tu te hui whakangahau, whakataetae a ngā kōhanga reo o Rahui Pookeka. Ki te pūtake o Taupiri Māunga i whakarauika mai ngā Kōhanga reo o Rahui Pookeka, Kaitimutimu Turangawaewae, Te Kaahu me Tawerawera ki te kuao o Taupiri ki te whakatūwaewae hei whakatō i te Tanuitanga o ā rātou Kōhanga reo.

Ko te Kiingitana te kaupapa arahi ko te Kōhanga reo te waka hei kawe i ngā mahi. KiKī ana te whare hui o Ngaruawaahia i te whānau i haramai hei korowai whakamahana i te hui. I tīmata nga mahi ki te karakia, me tētahi mahi whakaako i ngā mokopuna ki te whakawhiti huarahi.

1-Matariki Tawerawera

Ko Ana Kurei tētahi o ngā kaiwhakahaere raua ko Rupene Te Pea, he āpiha, he mokai whakaako i ngā mokopuna ki te whakawhiti huarahi. He mokopuna anō a Ana nō te kōhanga reo o Waioeka, ā e whakatutuki ana ia iāna mahi ki te Whare Wānanga o Waikato.

Mutu ana ngā mahi a Rupene Te Pea raua ko Ana he paramanawa, ka huri ia ki paepae mo te hunga whakawā. Mōhio tonu he tino kaupapa e haere ake nei. Ko te hunga whakawā ko Ngaire Horn, Nanny Hekeiterangi Broughton, Ana Kurei rātou ko Gillean.

Hei ta Ngaire Horn he uaua rawa te mahi kaiwhakawā ngā te mea he mokopuna kātoa rātou nōna. Piaataata mai ana ngā kākahu,  he whakamenomeno te mahi a ngā mokopuna ki te whakaatu i ā rātou kākahu ataahua.

Ko te kinaki he whaikōrero, he haka, he waiata. Haruru pai ana te papa i te tū whakahīhī o mokopuna o tērā kōhanga reo ō tēra Kōhanga reo.

Karawhiu mai ana te reo mihi o ngā tuakana me te whakapuaki anō i ngā tongi a Kīingi Tawhiao, me ngā whakatauki ō Tainui waka. I hakari nui ai ngā whatu ki ngā mahi ataahua i horaina ki mua i te whānau i tae atu. He oranga mō te whānau, he oranga ānō mō ngā mokopuna, he oranga hoki mō te kaupapa.

1-Matariki Tawerawera1

I te otinga ō ngā mahi ko Te Kōhanga Reo o Tawerawera ki te Kuao o Taupiri te toa, ka riro ki a rātau te taonga whakamaumahara a te Kōhanga reo mō te tau 2016. Heoi hei aha rā mō ngā mokopuna kua pau ngā hau, kua hiamoe.

Ka mutu he rā e kore e warewaretia engari ka titi ki te whatumanawa hei koanga ngakau hei hokinga mahara, koinei ngā pītau whakarei oi Tainui waka, Waikato Taniwharau, he piko, he taniwha, he piko he kōhanga reo.