Tēna koutou e te iwi, Daniel Procter tōku ingoa he uri au no Ue Pohatu, Ngāti Rangiwaho, Ngāi Tāmanuhiri,  me kī nō Te Tairawhiti whānui.  Tōku pānga ki te kaupapa rangatira nei ko “Te  Kōhanga Reo”, tuatahi he Matua au ki roto i te kaupapa, ā i whānau mai, i tipu au ki roto i te kaupapa nei. I te tau 1987 i tono aku Mātua i a au, ki te kōhanga i Tūranga, ko te Iti Kahurangi tōna ingoa kāre e tū ana inaianei.

Raniera Procter

Raniera Procter

Ko aku mahara mō ngā kuia i tae mai ki te Kōhanga, Ko te Kuia a Aupi Kaiwae, te Kuia Maiangi Maru, te korua a Bob Maru, Riria Awatere, me kī ko ngā tino Kuia o te kainga i ngā tau 80, ngā rātou te kaupapa i tuku. Ko tā rātou ko te mea nui ko te reo Māori, ēhara i te mea kikokiko, he mea wairua. No reira ahakoa kei te kōrero te reo ki te ao kikokiko, ko te ao wairua kei te kōrero hoki te ao wairua. Ko te wairua tēra e kōrero ana ki te wairua. Kāre tērā āhuatanga e taea e reo kē. Nā te Kōhanga Reo o Turaki Ao ki Tūranga au i tono, ā, he Papa hoki au ki taua Kōhanga Reo nā rātou au i tono. Nā runga anō pēa i aku mahi ara te rauora i ngā whānau, ara ko te social work tērā, koina tāku tino mahi. Nō reira,  nā ēra Ao e rua  ka tāpirihia, hei pūkenga mō te Kōhanga reo ki te Poari Matua. Mō taku tūranga ki runga i te Poari Matua, kāore kē he taumata i tua atu ō ngā mahi, nō reira ki te uru atu te tangata ki taua momo taumata me ruku hōhongu. Ki te whakaaro koe mo ngā ingoa i mua, a Wī Te Tau Huata, Tā Hemi Henare, Te Atairangi Kaahu, tēra momo tangata he tua tangata. He mahi nui i te mea ko koe e tāwharau ana i ngā Kōhanga reo 400 neke atu, i ngā mokopuna 9000 neke atu nō reira ēhara i te mahi kai paraoa noaiho. Nō reira ko te manuka kua takoto, tāku kawea ake, kawea ake, ki te kōmata o te rangi . Kia Ora