Korowaitanga-2015-2

Hūtia te rito ote harakeke kei hea te komako e ko e…uia mai e koe he aha te mea nui o tēnei ao māku e kii he tangata, he tangata hō!

E ngā manukura, e ngā whatukura e ngā kākā tarahae o ngā Kōhanga reo o te motu, ko koutou tēra kua rapu i ngā kete o te matauranga, i eke ai ki te toi o ngā rangi, ki te kapo atu i te maramatanga hei whāngai ki ngā tamariki, mokopuna me a rātou whānau. Nō tātou te whiwhi nō koutou te hōnore.

Kua tae tātou ki te wā o te tau e kitea ngā hua, ngā werawera, o ngā mahi o ngā pō ki muri. I whakakao mai ai ngā whānau, me ngā kuia, koroua, ngā kaitautoko i te whakarite i wā ratou ākonga ki te whakatutuki i a rātou kaupapa ako.

Ko te Takai Matua, Ko Te Ara Tuatahi, Te Ara Tuarua, Ko Te Tohu Te Whakapakari Tino Rangatiratanga o Te Kōhanga Reo, ko ēnei nga kaupapa motuhake nō te Kōhanga Reo.

Waiariki/ Tuwharetoa

1-Korowaitanga Te Kotuku Pukoro-001

Mai Tongariro ki Maketu, ko Te Waiariki, Tuwharetoa tera e puia ake mai me ngā wai koropupū o te Korowaitanga, te tuatahi mō te tau. I tū te rā nui ki Rotorua ki tetahi o nga whare manaaki o reira.

Ahakoa pokeao te rohe i ngā tini mate o aitua, te iwi mokemoke, i kaha tonu tēnei hunga ki te kawe i ngā mahi a te iwi kikokiko.

Tata ki te 300 rau te hunga i tae atu, hei kaikite, hei kaihaka tautoko i a ratouna whānau kua eke. Ahakoa koinei te whakamutunga o ngā akonga mo te tau o Matariki, i angitu tonu te tokomaha i whakawhiwhia ki a rātou tohu kia 20 ngā kaiwhiwhi i te tohu Whakapakari.

Hei ta Te Maari Whare Kaitiaki mō te rohe nei, kātahi te hui ātaahua ko tēnei mō te rohe o Te Waiariki Tuwharetoa, mō te haramai ki tētahi wāhi pākeha, engari anō ko te painga, kua whai wā te katoa ki te whakapaipai i a rātou, te whakatā, me te āta noho ki te matakitaki i wā rātou ākonga e whakanuia ana.

Tuarua he tuku aroha ki o tātou mate ahakoa te toko maha,ka hoki ngā mahara ki tō tātou kuia, a Matahera Zelda Brown i hinga atu i tēnei tau. He aroha nui ki a ia kua ngaro me tōna whānau e noho mokemoke nei.

1-Korowaitanga Te Kotuku Pukoro1

Tainui.

1-Tainui Korowaitanga 2015

I karangahia te iwi kia whakarauika mai ki te Marae o Kirikiriroa ki te whakanui i te Korowaitanga o Tainui. He hui nui ara i tae atu ko Kararaina Cribb te Tumu Whakarae o te Kōhanga reo, a Tina Olsen Rata mai i te Poari, a Heke Huata rātou ko Titia Graham.

Ahakoa tēra ko ngā tino whetu o te rā ko ngā akonga i whakawhiwhia ki a rātou tohu. Haneanea ana te noho a ngā whänau mē ngā akonga. Tata ki te 50 katoa ngā akonga i whakawhiwhia ki a rātou tohu.

 

Mataatua/ Tauranga Moana.

1-Mataatua Korowaitanga 2015

 

Kei nga rangatira o te purapura o Te Whānau ā Apanui, Ki te hiki i te mana o te kaupapa te whakatau i te wairua o te tangata, te whakanui i a tātou ākonga, te whakatinana, i te tohungatanga o te manaaki i ta tātou Korowaitanga

Te mihi ra a te rohe tēnei ka rere mai te ngākau

 

Aotea

1-Aotea Korowaitanga 2015

Ko Ruapehu, ko Taranaki ngā maunga mai i te mātapuna heke ki te te kōpu nui a Tangaroa, kei waenganui ko ngā whānau o te Kōhanga Reo e noho ora ana.

Neke atu i te kotahi rau nga ākonga i whakawhiwhia heoi 15 nga kaiwhiwhi i te tohu o Te Whakapakari ki te Korowaitanga o Aotea ki te papa riehi hoiho ki Whanganui. Ko te aronganui o tēnei Korowaitanga he hāngai pū ki ngā ākonga me ngā mahi whakahirahira i oti i a rātou.

08-Copy (2) of P1160170

Ngā tohu whakapakari.

 

E ai kia Ruka Broughton Kaitiaki mō te rohe o Aotea, ko tētahi mahi nui he noho tahi ki ngā ākonga ki te kōrero ki te whakaara i ō rātou ake whakaaro mō ngā hua o te whai i ēnei tohu. Etahi ō rātou hoki e kore mōhio ki te tuhi i ō rātou ake ingoa.

I kii atu tētahi ākonga ki a Ruka koinei te wā tuatahi kua whiwhi tohu ia mai i te wā i wehe mai ia i te kura tuarua. Ahakoa te rereke ō ngā Korowaitanga, orite te kitea o te harikoa ki runga i ngā mata o ngā ākonga i tā rātou whakawhiwhia ki ā rātou tohu. Nō reira mai i ngā akoranga o te Kōhanga reo ka kii te ngakau, te me te wairua o te ākonga.

He maha hoki nga hua e kore e kitea ā tuhi, ā purongo nei, engari ka kōrero atu ki ngā ākonga ka maringi mai ngā momo korero, whakamihi me te whakanui.

1-Aotea Korowaitanga 20151

 

E ai ki a Ruka kaare he kaupapa i tua atu i te Kōhanga reo ki te whakakaha ki te tautoko me te awhi i ā tātou whānau, Kaumatua mai, pakeke mai, tamariki mai. Hei tāna anō he maha ngā huarahi, he tini ngā puna matauranga hei whai, me ngana tonu tātou ki te kapo hoki i ēra atu.

Te Tairawhiti

2-12376162_508176599361207_1928536597647505698_n

Mai Potikirua ū tonu ki roto o Turanga whänau, ki roto o Te Mahia, koira tonu te rahinga o Takitumu waka, o Horouta waka i here ki Waihirere Marae, ki Manahi ki te whakanui i a rātou ngā ākonga katoa.

Ko Ahititi te maunga, ko Ngati Kohuru te hapü ko te Aitanga a Mahaki te iwi, ko Parahi Manahi te whare tipuna.

E rua nga kaiwhiwhi i te tohu Whakapakari he kotiro, i haere ki te Kura Kaupapa, Whare Wānanga, kua hoki mai inaianei e mahi ana ki te Kōhanga Reo ko Matekino Moana tēra no te whānau o Hinerupe kei te Kōhanga reo o Whanau Aroha. Ko Kumeroa Raihania White kua whihwhi i tōna tohu Whakapakari ahakoa tōna mauiui, i whai kaha tonu ki te whakatutuki i tēnei o ngā tohu. Ko ia hoki te mama o Irena Smith mai i Te Karere.

Ko tētahi o ngā honore mīharo i tukunga ki a Mere Teepa, i whakawhiwhia e te Purapura o Tātou Tātou, ki te tohu o Te Whariki. Nō reira ka mihi ki ngā whānau me ngā ākonga katoa i korowaitia i tēnei rā.

1-12369250_508176109361256_74450991297782762_n