1-IMG_7352

Kahurangi Iritana Tawhiwhirangi

 

E rau rangatira mā, e ngā puna kōrero o ngā iwi maha o te motu, tēnā koutou katoa.

He mihi whakanui tēnei ki ngā mokopuna me ō rātou whānau, mō ā koutou mahi whai kaha ki te poipoi i ā tātou tamariki, mokopuna ki roto i te reo me ngā tikanga o te ao Māori.

Mai i tōna tīmatatanga tae noa ki ēnei rā, ko te manako nui kia eke ā tātou tamariki mokopuna ki ngā taumata tiketike o te ao. I tenei tau, 2016, 52 ngā karahipi kua whakawhiwhia ki ngā mokopuna puta noa i te motu, rātou i tīmata i roto mai i te Kōhanga reo. Ināianei, kua kuhu rātou ki ngā whare ako Wānanga, Takiura me ngā Kuratini hoki, tau kē!

E kare mā, kua tutuki i a koutou te moemoeā a ngā kaumātua, koroua, kuia i ngā tau ki muri. Koia rā te kākano i whakatōngia, kia tipu ai te mokopuna ki roto i te reo me ngā tikanga, kia kore e ngaro manu moa atu, engari kia tū tangata tonu ki tēnei ao.

Nō reira kei te harikoa te ngākau ki te rongo i te hihiri o ngā mahi kua oti, otirā, ko ngā mahi kei mua tonu i a koutou, i a tātou hoki. E whakapono ana, mā enei mahi tautoko e ora tonu ai te Kōhanga Reo me te wairua Māori.

E kī ai a Tā Hemi Henare, kua tawhiti kē tō haerenga mai, kia kore e haere tonu. He tino nui rawa āu mahi, kia kore e mahi tonu.

Kāti ake, kia mau ki te hoe, hōea tō waka kia ū, kia manawanui. Mā te Atua koutou katoa e manaaki, e tiaki.  Noho ora mai.

Kahurangi Iritana Tawhiwhirangi.