Ngāti Porou, Ngāti Kahungunu, Tainui

Nanny-Aroha-me-nga-rangatira

Nanny Aroha Paenga me ngā rangatira mō apopo.

 

Ko te mea nui ki te ako i wā tātou tamariki, mokopuna ki te reo. E taea e rātou ki te hokihoki ki o rātou wā kainga i te mea ēhara i te mea kōtahi anake te wā kainga, kia kaua e pupuri i roto i ā koe, engari  me huri ki te tutaki i ngā kuia, kaumatua no tēra rohe no tēra moka, kia ako ai ngā tamariki.

Mahara tonu au i te wā i tīmata te kaupapa o te Kōhanga reo i Waiwhetu engari e rua tau whai muri ka timata mātou i te tau 1983. I te mea i tūwhera tō mātou wharenui i te tau 1980, e rua tau ki muri ka tīmata te Kōhanga reo. I tīmata mātou ki tētahi whare karukaru, he kōhao heoi ngā Pāpā Pita mā i whakatikatika i raro  tētahi kaupapa ngā te Tari Māori.  Heoi i waho au i roto i ngā Kura auraki e mahi ana, ka rāngona e au i ngā korero e pā ana ki tēnei kaupapa te Kōhanga reo, ākuni ka mate te reo. Kāre au i pai ki tēra ka tino mamae ahau i te mea i whakatipuhia au e ngā Kuia, Kaumatua ō Whangarā, ko te reo Māori te reo e korerohia ana. Nō reira kāre au i pai ki te rongo ki tēra, kei te mate haere te reo.

Ka tae mai au ki te Kōhanga, ka noho ki raro i ngā parirau o Nani Hārai, kāre hoki au i mōhio ki te tino hōhonutanga ō te kaupapa o te Kōhanga reo i taua wā. Ko tāku noa mēna ka ngaro te reo kei hea tātou te iwi Māori?

He kaupapa tino uaua te Kōhanga Reo nō ngā mahi a tauiwi mai rāno i ngā rā o nehe, he rerekē te tipu ki o tātou Mātua Tipuna. Ka hunku mai ngā whānau ki ngā taone, ka mau ki ngā whakaaro o tauiwi, te nuinga o rātou.

Kā uaua anō mō ngā Mātua i te mea kei te mahi rātou, e kore e whai wā ki te haere ki ngā karaihe ki te whakapakari i a rātou reo arā ki ngā kaupapa ako a Te Poari Matua ō te Kōhanga reo.

Heoi mā tātou tonu e whakatika kia ana whakamua ai tātou, e kore e taea te kī, kua oti kua tutuki  te kaupapa. Ko te mahi nui ki te awhi tonu i ngā whānau mē ngā rangatahi, mā tēra kā taea. Engari me kaha tonu tātou ia rā, ia wiki, ia marama kia puāwai, kia mau tonu te kaha ki tō tātou reo.

Koka-Aroha-Paenga--QSM

Nō reira ko tēnei tohu mētara, nō rātou, ngā kuia, koroua i whakatipu mai i ā au, ki te kore rātou kahore au e whiwhi i tēnei metara, nō  reira kei te mihi ki a rātou kei tua o te ārai. Ināianei ko tā tātou mahi, he whai i ngā tapuwae i waihotia mai,  he whakapaipai hoki i te huarahi mō rātou ngā mokopuna, kaua e tiro whakamuri engari me ana whakamua tātou ahakoa te aha. Kia rite kia tika ai te huarahi kei mua i a rātou ngā tamariki mokopuna..

Nanny-Aroha-me-te-whanau

Nanny Aroha me te Kōhanga Reo o Hoani Waititi Marae.