Matariki ki Papakura Marae

Matariki ki Papakura Marae

I te wā o Matariki he maha ngā Kōhanga reo i whakatū kaupapa ki te whakanui i te māhuri o te tau ara te tau hou Māori ko Matariki tēra kua mahuta mai i te tahatū o te rangi.

Ahakoa he maha ngā hui ōrite ana ngā kaupapa, ko te reo me ōna tikanga, ko te whakawhanaungatanga, te noho tahi a te pakeke me te mokopuna, ngā tuakana me ngā teina ki raro i te korowai o te aroha.

E rua ngā hui nui ki Tāmaki-makau-rau ko tētahi ki Papakura, ko tētahi atu ki te Marae o Ngāti Otara. He kaupapa hoki i tautokohia e Te Puni Kōkiri, hei hāpai i ngā whānau me te hunga e noho tōpuni ana ki ngā rohe taone ki tuawhenua hoki.

Matariki Ki Ngati Otara Marae

Matariki Ki Ngati Otara Marae

E iwa ngā Kōhanga reo i tae atu ki te whakanui i te wā o Matariki ki Ngāti Otara Marae, he mahinga tahi, e kitea ai te harikoa, me te parekareka o ngā mahi a ngā Purapura kia puta he hua mo ngā mokopuna me a rātou whānau.

I tae atu hoki ko ngā Pirihimana me tā rātou kuri a “Case”, ki te tuitui i te taura here ki waenga i a rātou me ngā mokopuna me ngā whānau hoki, i roto i te wairua tautoko me te ngākau mahaki.

Tētahi o ngā Papa & Sonny Wilcox

Tētahi o ngā Papa raua ko Sonny Wilcox

Hei tā Sonny Wilcox te kaitakawaenga Pirihimana mō te tonga o Tāmaki-makau-rau, kua rātou e toro ana ki ngā Kōhanga reo, kia kitea te huarahi ngawari e puta ai he painga mo te hāpori me a tātou tamariki. Ko te mea nui hoki kua whakatauhia ia e ngā kaumatua o ngā Kōhanga reo, e wātea ai te huarahi whakawhiti whakaaro ki waenga i a mātou o ngā Kōhanga reo me ngā Pirihimana.

Heoi ko te mana nui ka riro kē ki ngā ringa  raupa, ngā ringawera o te kaupapa e whakapau kaha ana kia tū he rangi ātaahua mō ngā Kōhanga Reo, kei whea mai te mihi, mei kore ake koutou.

Watch highlights of Ngāti Otara Matariki event below.