Tēnā anō rā tātou katoa

E pā tata mai nei te wā e whakanuitia ai te rā whānau o Te Kaiwhakaora o te ao, te wā e tahuri ai ō tātou whakaaro ki ō tātou whānau me te noho tahi, kai tahi, kata tahi i roto i ā tātou whakanui. I roto anō hoki i te tūrangahakoa o te noho, ko te hoki whakamuri o mahara ki ērā o tātou kua kore i konei i te wā nei.  Nā reira ka tangi te ngākau ki a rātou me te kī, moe mai rā koutou, moe mai rā.

Meri-Kirihimete-Poari-2015

He mihi Meri Kirihimete hoki mai i a Te Wharehuia raua ko Raniera Proctor.

 

He tau tino nui nei ngā heke engari, i konā anō ōna tino piki arā, kua eke mai ko Kararaina Cribb hei kaiurungi mō tō tātou waka, kua eke mai ko Raniera Proctor hei mema hou mō te Poari, kua tīmata hoki te kitea o te aroarowhenua o angitu i roto i ā tātou mahi katoa.  Nā, i pēnei ai nā koutou me tō koutou kaha tautoko mai i tō koutou Poari me ngā mahi e mahia ana i te tari matua hei painga mō te Kaupapa puta, puta, nā konei te mihi nui rawa atu a te Poari ki a koutou katoa ahakoa kei hea koutou e whai ana, e taunaki ana i tā tātou Kaupapa.

Ko te inoi a te ngākau kia tau mai ngā manaakitanga a Te Wāhi Ngaro ki runga i a tātou katoa i a tātou ka aronui nei i te hoki tēnā ki tōna kāinga, ki tōna whānau. Kia tīkina atu anō ko aua mihi o tēnei wā o te tau, arā, Meri Kirihimete rā ki a koutou katoa, kia tino pai hoki ngā whakawhiwhinga mai a Te Tau Hou.

Nā te Poari Matua