Nā Whitiaua Ropitini

Nā Te Taura Whiri ēnei Whakaahua

Nā Te Taura Whiri ēnei Whakaahua

Kō atu i te ono mano ngā tāngata i whakaeke ki runga i ngā tiriti o te pokapū o Te Whanganui a Tara, i runga i te kaupapa o te reo i ngā whakanui i Te Wiki o Te Reo Māori. Huihui mai ana te tini me te mano, Māori mai, Tauiwi mai ki te tautoko i tēnei kaupapa whakahirahira, te whakatairangahia i te reo Māori.

He tuatahi tēnei tūmomo huihuinga reo Māori, ā, i riro ma Te Hikoi Reo Māori hei whakamānu i Te Wiki o te Reo Māori mo tēnei tau 2016.

Kitea ana te ngākau nui o ngā iwi maha ki te tautoko i te whai a Te Taura Whiri i te Reo Māori, ki te whakaataata i te reo Māori kia rangona tōna rōreka i ngā wāhi katoa o Aotearoa. A i whakaarohia te whakaaro ki te kawe i tēnei kaupapa ki waenganui tonu i ao Pākehā.

Whai wāhi mai ana ngā kura Māori, kura Auraki, Whare Wānanga, ngā tari Kāwana, ngā tari rāngai tūmatanui me ngā tari rāngaitūmataiti ki te hīkoi tahi me ō tātau Kōhanga Reo tekau  ma rua i hīkoi i te hīkoi. Kikī ana i ngā kanohi maha o Aotearoa.

Nā Te Taura Whiri ēnei whakaahua

Nā Te Taura Whiri ēnei whakaahua

Kitea ana te ngākau nui me te rikarika o te iwi nei ki te whakatangi  tō tātou reo taketake kia wawao i ngā taringa o te hunga whakapono kore ki tō tātou reo wainene.

Ahakoa te mātinitini o te tangata i whakarauika ki te tautoko i tēnei kaupapa whakahirahira, i kitea tonu te hīkaka o ngā iti pounamu o wō tātou Kōhanga Reo e ōkaka ana ki te takahi i ngā tiriti nei. He kōneke whakarākei ā ētahi, he whakapaipai kanohi ā ētahi, he whakapaipai kākahu ā ētahi o ngā kōhanga.

Haruru ana te tangi o ngā reo waiata o ngā tamariki mokopuna ki te waiata i ngā waiata whakangahau a ō rātou kōhanga reo. Wawāra ana te tangi o ngā rakuraku. Hari koa ana o rātou kanohi ki te kite i tētahi āhuatanga rerekē, pēnei rawa te nui taioreore.

Te Kōhanga reo o Tītahi Bay Porirua

Te Kōhanga reo o Tītahi Bay Porirua

I tīmata te hīkoi mai i 55 Lambton Quay, ka heke mā te pokapū o te taone nui, ki a puta ki Te Papa Tongarewa. E ai ki ngā tātaritanga a te ope pirihimana i mutu tā rātau kaute i te rima mano mā rima tāngata. Heoi ki tā te matapaki neke atu te whika, inā koa, i te nui o te tangata i taiope ake ki te tautoko i te karanga o te rā.

I te ūhanga o te ope hīkoi ki Te Papa, whakatautau ana ngā haka taparahi o ngā kura tuarua hei pōhiri i te ope nei. Tau ana te ope ki Te Papa, whakatangitangi mai ana ngā reo o te hunga whakataki o runga i te ātāmira. Ko Maia Te Koha raua ko Anthony Wanakore (he tauira o mua o te kōhanga). Nō rāua te mahi nui ki te whakamaimoa i ngā taringa o te iwi nui. Ko te reo Māori te reo rangona i runga i te atamira. He waiata, he haka, he kōrero paki, he kōrero whakangahau ngā mahi o runga i te atamira. Noho tahi ana te iwi ki te kai tahi, kōrero tahi, waiata tahi i runga i te kaupapa o te whakatairanga i te reo Māori.

Makōhakoha ana te noho o te iwi. Kitea ana te whakawhanaungatanga me te waiaroha o te iwi ki te kaupapa nui whakaraharaha nei. No ngā kōhanga te kaha me te manawanui ki te tautoko i tēnei kaupapa. Tōpū ana ngā kōhanga katoa o Te Whanganui a Tara ki te ono i tēnei huihuinga nui. Kāore i ārikarika i a rātau te whakakanohi i te kaupapa o te kōhanga. Ka toko te whakaaro i roto koia nei pea tā Te Taura Whiri i tūmanako, ki a riro mā ngā tamariki mokopuna, ngā rangatira o āpōpō hei whakatairanga i te reo, inā hoki ko rātou ngā rangatira o āpōpō. Mehemea koia te whai, kāti i puawai tērā, inā hoki ka taea e ngā mokopuna nei te kī, i reira rātau i te Hikoi Reo Māori tuatahi o te ao.